السلام عليكم ورحمة الله وبركاته
كل سنة وأنتوا طيبين
انا عارف إن شهر رمضان شهر جميل وضيف خفيف وتقريبا هو الشهر الوحيد إلى بنرجع فيه لكل عاداتنا الجميلة والفرحة بتملى كل بيت مسلم
لكن كمان فيه بعض السلبيات إلى إتعودنا عليها
آه إحنا مش بنشوفها على إنها سلبيات بس بتغير من طعم الشهر شوية وبتخلينا نعمله
حساب كبير وهو أصلا شهر ربنا أكرمنا بيه علشان نغتنمه مش ننشغل عنه
أسيبكم دلوقتى مع القصيدة ويارب تعجبكم
بسم الله الرحمن الرحيم
هو كدا يبقى رمضان !
يلا قوام جبلنا فوانيس
قبل ما يبدأ شهر الصوم
علشان يفرح بيها أطفالنا
ما هو جارنا جابها من كام يوم
ماتنساش تروح للبقال
وإدفع مقدم للجزار
والفكهانى وبتاع الخضار
وهات معاك ياميش رمضان
وهات معاك ...........
ولا أقولك كفاية كدا تمام
فات من رمضان أيام
والراجل جيوبه نضيفه
من كتر الطلبات مش قادر ينام
هو بكدا يبقى رمضان ؟
مش بذمتكم حرام !
وعلى المكتب فى الشغل ينام
مش هشتغل أنا تعبان
يا جماعة دا شهر صيام
يرجع البيت مليان لحمة وحلويات وخضار
أعملى كله على الفطار
دا أنا صايم طول النهار
والهانم فى المكتب مطبخ
ومقضياها كلام
عن برامج ومسلسلات
والفوازير كانت زمان
هو فيه أجمل من شريهان
والبيه نايم باقى اليوم
والهانم شغالة تليفون
مش بتسلى صيامها الهانم
هو بكدا يبقى رمضان ؟
مش بذمتتكم حرام !
وبقينا فى النص التانى
من شهر الخير والقرآن
عايزين نعمل كحك العيد
وكمان نشترى لبس جديد
بيقولوا فيه موديلات جنان
ياترى هتكلفنا دى كام
طول الشهر مصاريف عمال على بطال
هو بكدا يبقى رمضان ؟
مش بذمتكم حرام !
الإثنين يوليو 13, 2015 8:46 pm من طرف الاسد المفترس
